Төрийн сүлдээ дээдлэн түмэн олноо хүндэтгэж ажил амьдралаа дэгжээж байгаа Богдчуудын нэрийн өмнөөс болон хувиасаа эрхэм хүндэт та бүхний амар мэндийг айлтган мэндчилье. Тус сумын нутгийн захиргаа, төрийн болон төрийн бус байгууллагууд нь  төр засгийн бодлого шийдвэрийг хэрэгжүүлэх, иргэддээ нийгмийн суурь үйлчилгээг чанар хүртээмжтэй, ил тод, түргэн шуурхай хүргэхийн төлөө иргэдийн оролцоонд түшиглэн  ажиллаж байна. Нутаг орныхоо хөгжил дэвшлийн төлөө иргэн бүр сэтгэл гарган хөдөлмөрлөж, үр шимийг нь хүртэн, өвөг дээдсийн минь ариун гал голомт болсон нутагтаа сайн сайхан амьдралыг цогцлоож, сумандаа хөгжил дэвшлийг бадраахын төлөө сэтгэл, зүтгэл гарган ажиллахыг уриалж бидний хийсэн, бүтээсэн, хийхийн төлөө зорьж байгаа мэдээллийг энэхүү хуудаснаас цаг алдалгүй авч байх болно оо.  Түүхт 100 жилийн босгон дээр олон жил хүсэн хүлээсэн Түйн голын төмөр бетонон гүүр  ашиглалтад  орж,  Аж  үйлдвэрийн гавьяат  ажилтан Ч.Ганцэцэг  МУ-ын  хөдөлмөрийн баатар цол,  ОБЕГ-ын хурандаа Думаагийн Намсрай “Бригадын генерал” цол тус тус хүртсэн нь тус сумын 100 жилийн түүхэн дэх анхны гэж хэлэх гавьяат үйлстэнгүүд төрөн гарч сумын түүхэнд анхдагч  болсон гээд олон сайхан амжилт бүтээл ар араасаа ундарсан сайхан жил болж өнгөрч байна аа.

Айл өрх бүрийн хойморт аз жаргал, инээд баясал цалгиж, хүн бүрийн зүрх сэтгэлд энэрэл нигүүслийн гэрэл гэгээ мөнхөд бадамлаж байх болтугай.

БОГД СУМЫН ЗАСАГ ДАРГА Л.ГАНАА